100 $ haqida hikoya

25.01.2017

1577

Кичкинагина шахарчага бир сайёх келди ва кичкинагина мехмонхонага кирди. Мехмонхона эгасига 100 доллар гаров пули қолдирди ва хоналар билан танишишга киришиб кетди. Мехмонхона эгаси қўлига тушган нақд пулдан зудлик билан фойдаланишга ахд қилди. У югуриб бориб қассобдан қарзини узиш учун 100 долларни узатди. Қассоб хам тезда бориб фермердан қарзини узди. Фермер тракторини тузатиб берган устадан қарзини узолмай хуноб бўлиб ўтирганди. 
Шахдам қадамлар билан устага пулни узатди. Уста озиқ-овқат олавериб дўкончидан 100 доллар қарз бўлиб қолгани эсига тушди ва дўкончининг ёнида юзи ёруғ бўлди. Дўкончи анчадан бери дўконни тозалаб юрган фаррошнинг ойлигини беролмаётганди. 100 долларни олган фаррош ижара пулини тўлаш учун мехмонхонага югурди ва хўжайинга пулни узатди. Хўжайин пулни олган пайтда юқори қаватдан сайёх тушди ва бу хоналар унга тўғри келмаслигини айтиб, пулини қайтариб олиб, жўнаворди. Хеч ким хеч нарсага эга бўлмаган бўлса-да, бутун шахарча қарзларидан қутилган ва келажакка ишонч билан қараётган эди.