2015 йилда энг кўп даромад кўрган футболчилар ва мураббийларнинг янги рейтинги эълон қилинди

11.04.2016

1276

«Барселона» жамоаси футболчиси Лионель Месси 2015 йилда 74 млн евро ишлаб топган ва у бу борадаги етакчилигини давом эттирган.

France Football нашри хабарига кўра, ўтган йилда аргентиналик футболчи ишлаб топган даромад миқдори 2014 йилдагига нисбатан 9 млн еврога кўпроқ бўлган.

«Реал» ҳужумчиси Криштиану Роналду бу борадаги рейтингда Мессидан кейин иккинчи бўлиб жойлашган— € 67,4 млн евро (Унинг натижаси 1 йил олдингига қараганда 13,4 млн еврога ортган).

Учинчи ўринда ўтган йилдаги каби «Барселона»нинг яна бир аъзоси Неймар жойлашган — 43,5 млн евро (+ 7 млн евро).

2015 йилнинг 17 декабрида «Челси» бош мураббийлигидан истеъфога чиқарилган португалиялик мутахассис Жозе Моуриньо эса ўтган йилда 24 млн евро ишлаб топиш орқали энг кўп даромад кўрган мураббийлар рўйхатини бошқарган. Бу борадаги кучли учликда Хосеп Гвардиола («Бавария») ва Фабио Капелло (2015 йилнинг 14 июлигача Россия терма жамоаси бош мураббийи) номлари қайд этилган.

Футболчилар ва мураббийларнинг даромадларини ҳисоблашда солиқ ва ижтимоий тўловлар ундирилишидан олдинги маоши, бонус ва реклама шартномаларидан тушган пуллар инобатга олинган.