2018 yilda ko'p qavatli uylarning atrofini obodonlashtirish uchun 94,3 milliard so'm miqdorida mablag' ajratiladi. Bu haqda O'zbekiston Respublikasi Moliya vazirligi rasmiy veb-saytida xabar qilingan.
Mazkur mablag'ning 47,1 milliard so'mi Qoraqalpog'iston Respublikasi, Toshkent shahri va viloyatlarning mahalliy byudjyeti hisobidan, qolgan qismi esa O'zbekiston Respublikasi Uy-joy kommunal xizmat ko'rsatish vazirligining Uy-joy kommunal xo'jaligini rivojlantirish jamg'armasi hisobidan qoplanadi.
Ushbu mablag'lar evaziga 2 ming 779 ta bolalar maydonchasini qurish va ta`mirlash (34,3 milliard so'm), 126,8 ming pogon metr sug'orish tarmoqlarini ta`mirlash (7,7 milliard so'm), 754,3 ming kvadrat metr yo'laklarga beton qoplash (44,3 milliard so'm), 7,1 ming dona tashqi yoritgichlarni ta`mirlash va almashtirish (7,9 milliard so'm) ishlari amalga oshiriladi.
Bugungi kunda respublikada ko'p qavatli uy-joylar soni 32,4 mingdan ortiq bo'lib, ularga to'rt mingdan ortig'iga xususiy uy-joy mulkdorlari shirkatlari tomonidan xizmat ko'rsatilmoqda.