AQSh ilk bor Еvropada ko'p maqsadli F-22 Raptor qiruvchi samolyotlarini joylashtirdi

AQSh 2014 yilda Ukraina atrofidagi vaziyat tufayli NATO bo'yicha ittifoqdoshlarining xavfsizligini mustahkamlash tashabbusiga muvofiq, birinchi marta Еvropada ko'p maqsadli F-22 Raptor qiruvchi samolyotlarini joylashtirdi.

AQSh harbiy-havo kuchlarining Еvropa va Afrikadagi qo'mondoni general Frenk Gorenkning aytishicha, "Stels” texnologiyasi bo'yicha yaratilgan 4ta F-22 Raptor samolyoti 28 avgust kuni AQShning Germaniyadagi Shpangdalem aviabazasiga etkazildi.

Bu samolyotlar bilan birga aviabazaga AQSh HXKning 95-eskadrilyasining 60 nafar harbiysi S-17 Globemaster harbiy-transport samolyotida keldi.

AQShning Еvropaga ushbu samolyotlarni tashlash niyatini 24 avgust kuni AQSh HXK vaziri Debora Li Jeyms ma'lum qilgan edi.

Vazir Rossiyaning xatti-harakatlari "hanuzgacha AQShda va uning evropalik ittifoqdoshlarida jiddiy xavotir uyg'otayotganini” ta'kidlamoqda.

Ta'kidlanishicha, samolyotlar Еvropadagi o'quv mashg'ulotlarida ishtirok etadi va NATOga a'zo davlatlarning harbiy bo'linmalari bilan o'zaro hamjihatlikda faoliyat yuritadi.

Beshinchi avlod F-22 Raptor samolyoti Boeing va Lockheed Martin kompaniyalari tomonidan yaratilgan bo'lib, AQShda 2005 yildan qurollanishga olingan. Samolyotni qurishda uni raqib radarlariga kamroq seziluvchi qiluvchi "stels” texnologiyasidan foydalanilgan. Samolyotdan jangovor sharoitlarda birinchi marta 2014 yilda "IShID” terrorchilik tashkilotiga qarshi Suriya va Iroqdagi havo operatsiyalarida foydalanilgan.