Barqarorlik uchun barcha mas’ul
02.11.2015 1724
Mamlakatimizda hukm surayotgan tinchlik-osoyishtalikni ko‘z
qorachig‘idek asrash, xalqimizning mehnati bilan bunyod etilgan
turli-tuman inshootlar, xonadonlarimizni yong‘indan muhofaza etish muhim
vazifalardan.
O‘zbekiston Respublikasining 2009-yil 30-sentabrdagi "Yong‘in
xavfsizligi to‘g‘risida”gi qonuni bu borada muhim dasturilamal
bo‘lmoqda. Mazkur qonunga binoan yong‘in xavfsizligi xizmati bilan birga
davlat va jamoat tashkilotlari, korxona va xo‘jaliklar, fuqarolar
o‘zini o‘zi boshqarish organlarining yong‘in xavfsizligi bo‘yicha
javobgarligi kuchaytirildi.
O‘zbekiston Respublikasi Ichki ishlar vazirligi Yong‘in xavfsizligi oliy
texnik maktabida "Yong‘in xavfsizligini ta’minlashning dolzarb
muammolari” mavzusida o‘tkazilgan ilmiy-amaliy anjumanda shu haqda so‘z
yuritildi.
Yong‘in xavfsizligi oliy texnik maktabi boshlig‘i A.Qo‘ldoshev va
boshqalar Prezidentimiz Islom Karimov rahnamoligida yong‘in
xavfsizligini ta’minlashga oid huquqiy asoslar mustahkamlangani xalqimiz
osoyishtaligiga xizmat qilayotganini ta’kidladi. Ushbu maqsadga
qaratilgan tuzilmalar faoliyati zamon talabidan kelib chiqib
takomillashtirib borilayotgani, sohaning malakali kadrlar bilan
ta’minlanayotgani yong‘inlarning oldini olishda muhim ahamiyat kasb
etayotir.
Bugungi kunda yong‘in xavfsizligi qismlari zamonaviy texnika va zarur
anjomlar bilan ta’minlangani, shu yo‘nalishda ilmiy izlanishlar izchil
davom ettirilayotgani natijasida yong‘inlar kamayishiga erishilmoqda.
Xususan, joriy yilning to‘qqiz oyi davomida o‘tgan yilning shu davriga
nisbatan yong‘inlar 5,1 foizga kamaygan.
Yong‘inning oldini olishda targ‘ibot-tushuntirish ishlari muhim
ahamiyatga ega. Shu bois yong‘in nazorati xizmati xodimlari aholi,
korxona va tashkilotlar xodimlari o‘rtasida yong‘in xavfsizligi
qoidalariga rioya etish, yong‘inlarning oldini olish borasida ko‘rilishi
zarur chora-tadbirlar yuzasidan muntazam tushuntirish ishlarini olib
bormoqda. Ayniqsa, bu borada yaxshi tushuncha va ko‘nikmaga ega
bo‘lmagan bolalar va yoshlar o‘rtasida targ‘ibot-tushuntirish tadbirlari
muntazam tashkil etilayotir.
O‘zbekiston Respublikasi Adliya, Moliya vazirliklari, Savdo-sanoat
palatasi, yirik korxona va tashkilotlar, sohaviy xizmatlar mas’ul
xodimlari, tegishli oliy o‘quv yurtlari vakillari ishtirok etgan
tadbirda iqtisodiyot tarmoqlari, ijtimoiy soha obyektlari va aholi turar
joylarida yong‘in xavfsizligini ta’minlash, xususiy mulk, kichik biznes
va tadbirkorlikni ishonchli himoya qilishda davlat yong‘in nazoratining
o‘rni, yong‘inga qarshi sug‘urtalashning bugungi kundagi talablari,
yong‘in xavfsizligini ta’minlash sohasida olib borilayotgan
ilmiy-tadqiqot ishlarini yanada chuqurlashtirishning ahamiyati xususida
ma’ruzalar tinglandi.