Bill Geyts Microsoft’ning 1,5 milliard dollarlik aktsiyalarini xayriyaga sarfladi

Microsoft асосчиси Билл Гейтс корпорациянинг бир қисм акцияларидан қутилди, дея хабар бермоқда kun.uz нашри Bloomberg ахборот агентлигига асосланиб. Хабар беришларича, Билл Гейтс умумий қиймати 1,5 миллиард долларга яқин бўлган 31 миллионта акцияни Bill and Melinda Gates хайрия жамғармаси инвестицияларини бошқарувчи Gates Foundation Asset Trust компаниясига тақдим этган. Натижада Билл Гейтснинг Microsoft’даги акциялар улуши 3 фоизгача қисқарган. Эътиборли томони, у ҳар чоракда тахминан 20 миллионтадан Microsoft акцияларини сотиб, хайрияга сарфламоқда. Агар Гейтс акцияларни сотиш бўйича шу суръатни сақлаб қолса, тўрт йилда унда бирорта ҳам Microsoft акцияси қолмайди. Маълумот учун, 2015 йил январида Билл ва унинг турмуш ўртоғи – Мелинда Гейтсга тегишли хайрия ташкилоти қашшоқ мамлакатлардаги болалар вакцинацияси ва иммунизацияси учун 1,55 миллиард доллар ажратган эди. Бундан аввалроқ, 2014 йилнинг сентябрида эса жаҳоннинг энг бадавлат одами (Bloomberg Billionaires Index маълумотларига кўра, унинг бойлиги 82,9 миллиард долларга тенг) Эбола вирусига қарши кураш учун 50 миллион доллар ажратган эди.