БИР НЕЧА ТОМОШАБИНЛАР ЎЛИМИГА САБАБ БЎЛГАН КОНЦЕРТ. АЙБДОР КИМ?

Шу йилнинг 8-август куни Урганчдаги концерт шодиёнаси азага уланди. Малумотларга қараганда шаҳар марказидаги "Ёшлар кўли”да хонанда Наврўз Собиров концерт берган. 10.000 тага яқин томошабин бўлган концертда кўлдаги кўприк панжараси бехосдан қулаган. Ким концерт билан, ким ўз жонини қутқариш билан овора бўлган. Маълумотларга қараганда, кутилмаган фалокат натижасида 15 фуқаро ўлган, яна ўнлаб фуқаро турли даражадаги тан жароҳати олган. Айни пайтда пойтахтдан Урганчга юборилган Ҳукумат комиссияси воқеани синчковлик билан ўрганмоқда. Биз хонанда Наврўз Собиров билан боғландик.

-Сиз ушбу концерт фалокатида ўзингизни қанчалар айбдор ҳис этяпсиз?

-Одамлар сенда айб йўқ дейишяпти.

-Бу қадар кўп томошабин жамланган экан, демак сиз Урганчда жуда машҳурсиз. Нечта қўшиғингиз бор?

-300 тага яқин.

-Концертга чипталар сотилганмиди?

-Текин концерт эди. Менга ҳокимият концерти дейишган. Апил-тапил кийиниб, 8-август куни "Ёшлар кўли”га бориб куйладим. Бошқа ҳеч нарсадан хабарим йўқ.

-Бир неча юртдошларингиз ўлганидан-чи? Хабарингиз борми, бундай нохуш маълумотдан?

-Ҳа, шундай дейишди. Мен фақат куйладим.

Машҳур ҳофиз Оғабек Собировнинг жияни Наврўз Собиров қисқа мулоқотда ана шундай жавоблар берди.

Одатда бирон лойиҳа режалаштираётганда содир бўлиши мумкин бўлган салбий жиҳатлар инобатга олинмайди. Кейин бирон ножўя ҳолат содир бўлса, ташкилотчилар атрофдан айбдор излайди. Ўлим билан якун топган мусиқий кеча... Айбдор ким? Кўприкни мустаҳкам қурмаган қурувчилар, концерт ташкилотчилари, назоратини йўқотган томошабинлар ё концертга рухсат берган амалдорларми? Ё қўшиқ куйлаган "фонограмма”чи?

Натижани кутамиз.

Жасур ҲАМРОЕВ