Bo`yalgan sochlarni qayta bo`yash qoidalari

01.02.2017

1929

Sochingiz ildizini bo`yamoqchimisiz? Balki rangini butunlay o`zgartirmoqchidirsiz? Unda quyidagi suratlar va ularga ilova qilingan maslahatlar siz uchun ayni muddao bo`ladi, degan umiddamiz.

1-maslahat

Bu maslahat ilgari sochinni umuman bo`yamagan, yoki bo`yaganiga 3 oy bo`lgan, yoxud sochinning tabiiy rangini o`zgartirib, yanada to`qroq qilish niyatida bo`lgan xotin-qizlarga juda asqotadi…

1. Sochingizni xo`llang, ammo yuvmang. Bo`yoqni sochingizning har bir tolasiga surting. Ildizi va uchlari qolib ketmasin.

2. Bo`yoq soch tolalariga tekis yotishi uchun sochlaringizni uqalang va yaxshi ta`sir qilishi uchun 20 daqiqaga qoldiring.

3. Oz miqdordagi suv yordamida bo`yoqni ko`pirtirib, boshni 3 daqiqa uqalang. So`ng yaxshilab yuving.

2-maslahat

Bu maslahat sochi bo`yalgan yoki sochini bo`yaganiga endigina 1-2 oy bo`lgan ayollarga asqatadi. Quyidagi jarayon sochingizning o`sib, rangi ajralib qolgan ildizlarini bo`yashga, ilgari bo`yalgan soch rangini yangilashga yordam beradi. Xullas, har ikkala usuldan birini tanlagan taqdiringizda ham bo`yashdan oldin sochingizni yuving. Sochingiz nam bo`lishi lozim.

1. Sochingiz nam vaqtida bo`yoqni surtib, 15-20 daqiqaga sellofan bilan o`rab qo`ying.

2. 20 daqiqadan keyin qolgan bo`yoqni sochlaringiz tolasi uzunligi bo`ylab surting va yana besh daqiqaga qoldiring.

3. Sochni yaxshilab yuvib, soch uchun mo`ljallangan balzamni surting

4. Soch ildizini ozroq iliq suv yordamida uqalang va yaxshilab yuvib tashlang.