БОЛЛИВУДНИНГ ЭНГ КЎП МУХЛИСГА ЭГА ЮЛДУЗИ “МУХЛИС” ФИЛЬМИДА МУХЛИС РОЛИДА!

YRF – Болливуддаги энг нуфузли кинокомпания асосчиси Яш Чопра вафотидан кейин барча масъулиятни ўз бўйнига олган режиссёрнинг ўғли Адитья Чопра продюсерлик бобида муваффақиятли фаолият юритмоқда. Сўнгги икки йил ичида компания лейбли остида катта экранларга олиб чиқилаётган фильмлар сони ҳам ортган. Шохрух Хон – Яш амакининг энг сўнгги картинаси – "То ҳаёт эканман”да бош ролни ижро этганди. Яш амаки вафотидан икки йил ўтиб, "Қирол Хон” яна нуфузли компаниянинг йирик лойиҳасида суратга тушишга розилик билдирди.

"Мухлис” – янги картина. Продюсер Адитья Чопранинг фикрича, бундай номли фильмда рол ижро этишга Шохрух Хондан бошқа яна ким ҳам муносиб? Ахир,  энг кўп мухлисга эгалик бобида Болливудда бу актрёрининг олдига ким ҳам туша олади!? 2014 йилнинг айни чилласи – июлда суратга олиш ишларига старт берилади. Хоннинг қиёфасини эсда қоларли тарзда яратиш учун Ҳолливуддан махсус макияж устаси таклиф этилган. Шу кунларда актёр Шохрух Хон, режиссёр Маниш Шарма, продюсер Адитья Чопра  ва макияж маэстроси Грег Кэнном студияда аниқ тўхтамга келиш борасида фикрлашмоқда. Грег Америка киноакадемияси мукофотига 9 марта номзоди кўрсатилиб, 3 карра "Оскар” ҳайкалчасини "Бенжамин Баттоннинг сирли тарихи» (2008), "Даутфайр хоним" ( 1993) ва " Дракула " (1992) фильмлари учун қўлга киритган. Янги фильм режиссёри Маниш шундай дейди: " Биз актёрни унинг кинода ёд бўлиб кетган қиёфасидан мутлоқ фарқ қиладиган янги қиёфасини яратишга ҳаракат қиляпмиз. Тўғри, бу жуда мураккаб жараён, бироқ, томошабинларга жуда қизиқарли бўлишига умид қиламиз" .

"Мухлис” фильми сценарийсини Ҳабиб Фейсал ёзган. Премьера эса 2015 йилнинг 14-августига мўлжалланган. Ҳозирча фильм иш жараёнларидан илк фотосуратларни эксклюзив тарзда сайтимизда томоша қилинг.

Жасур ҲАМРОЕВ