DS маркаси 402 қувватли электрокупени тақдим этди

Citroen компаниясининг DS маркаси 402 қувватли электр концепт кари — E-Tence’ни тақдим этди. Купенинг илк намойиши март ойи бошида Женевада ўтказиладиган автосалонда бўлиб ўтади.

Прототипнинг умумий узунлиги 4,12 метр, эни – 2,08 метр, баландлиги эса 1,29 метрни ташкил этади. Спорткар олд ва орқа тарафдан икки тиркамали подвескалар билан таъминланган.

Ушбу янги машина электр агрегат билан бойитилган бўлиб, у 402 от кучини бера олади. Двигатель мажмуадаги литий-ионли батареядан қувват олади. DS E-Tence юз километр тезликка тўрт сонияда чиқишга муваффақ бўлади. Унинг максимал тезлиги соатига 250 км. ни ташкил этади.

Прототипни 2014 йил Париж автосалонида намойиш этилган Citroen Divine DS хэтчбеки услубида шакллантиришди. Бундан ташқари, прототипнинг орқа дизайнерлик ечимлари 1955 йилда ишлаб чиқарилган Citroen DS машинасидан олинган.

DS E-Tence купеси LED чироқлар билан таъминланган бўлиб, улар 180 даража бурчакда жойлаштирилган. Айтишларича мазкур технологиядан келгуси ишлаб чиқарилувчи автомобилларда фойдаланилади.