У нас есть только
оригинальные песни

Erta turish uchun 10 sabab va buni amalga oshirishning yo'llari

calendar 26.02.2017
2048

"Эрта уйқуга ётиб, эрта уйғониш инсонни соғлом, бадавлат ва доно қилади". Бен Франклин

Эрта туришнинг устунликлари жуда кўп. BusinessInsider Зен Ҳабитснинг шу ҳақидаги мақоласи билан бўлишди.

Агар сизнинг кун тартибингиз "бойўғли" режими (тунда фаол, кундузи нофаол)га тўғри келса, бу яхши. Унда ўзгартиришга ҳожат йўқ. Бироқ "бойўғли" режимидан "сўфитўрғай" режими (кундузи фаол, тунда нофаол)га ўтишга қарор қилган бўлсангиз, қуйидаги тавсиялар сизга ёрдам беради деб умид қиламиз.

 

1. Кунни шукроналик билан қарши ол

Мен эрталаб уйғониб, янги кунни қаршилашни яхши кўраман. Тонгда туриб, барчаси учун шукроналик келтиришни одат қилинг. Ўзингизга ўзингиз "Уйқудан уйғонганимдан бахтиёрман, мен тирикман, менга қимматли ҳаёт инъом этилди ва мен уни бекорга сарфламоқчи эмасман. Мен бор кучимни ўзимни ривожлантириш, бошқаларга нисбатан кўнгилни кенг қилиш, бошқаларга нисбатан ижобий фикрлашга сарфлайман. Мен жаҳл қилиб, бошқалар ҳақида салбий фикрламоқчи эмасман. Имкон қадар бошқаларга фойда келтиришга ҳаракат қиламан", - деб айтинг.

 

2. Ажойиб старт

Мен ўз кунимни одатда кеч уйғониб, шоша-пиша тайёргарлик кўриб, болаларни мактабга ташлаб, ишга кеч қолишдан бошлардим. Куннинг бундай бошланиши яхши эмас, албатта.

Энди эса менинг эрталабки одатларим ўзгарди, ҳозир мен соат 8:00гача анча нарсага улгураман, фарзандларим ва мен эрта уйғонамиз. Тажрибам шуни кўрсатадики, кунни эрта туришдан бошлашдан яхшиси йўқ.

 

3. Сокинлик

Тонг шу қадар сокинки, унда на қичқираётган болалар, на футбол тўплари, на машиналар ва на телевизор шовқини бўлмайди. Бу менинг кун давомидаги энг севимли лаҳзаларим. Мен ўзим учун ажратилган, тинчгина ўйлашим, ўқишим ва нафас олишим мумкин бўлган вақтдан завқ оламан.

 

4. Қуёш чиқиши

Уйқудан кеч уйғонадиганлар табиатнинг энг ажиб гўзалликларидан бири - қуёшнинг чиқишини кўра олишмайди. Мен куннинг аста-секинлик билан ёришиб бораётгани, табиат турфа рангларга кираётганини кузатишни яхши кўраман.

Мен эрталабки югуриш машқларини айнан шу вақтда бажараман. Осмонга қараб "Қандай ажойиб кун!" дейман. Аслида ҳам шундай.

 

5. Нонушта

Эрта тонгда уйғонсангиз, нонушта қилишга бемалол вақт топа оласиз. Менинг фиркимча, бу кун давомидаги энг муҳим таомланиш вақтларидан бири. Нонуштасиз тушликкача самарали ишлаш қийин, кейин эса оч қоринга ёғлироқ ёки ширинроқ нарса еб қўйишингиз мумкин.

Нонушта ўз вақтида қилинса, кечга қадар ўзингизни тетик ҳис қиласиз. Бундан ташқари, эрталаб китоб мутолаа қилиб нонушта қилиш, хотиржам қаҳва ичиш - ишга кетаётиб ёки иш жойида шоша-пиша бирор нарса еб олгандан кўра ёқимлироқдир. 

 

6. Жисмоний машқлар

Жисмоний машқларни бажариш учун тонгдан бошқа пайтлар ҳам бор, албатта, ишдан кейин машқ қилиш ҳам жуда ёқимли бўлиши мумкин. Шундай бўлса-да, эрталабки бадантарбия деярли ҳеч қачон канда қилинмайди.

 

7. Самарадорлик

Мен учун куннинг биринчи ярми самаралироқ. Эрталаб ҳеч қандай чалғитувчи омиллар йўқлигида муҳим нарсаларни ёзиб олиш мумкин, кейин эса электрон почтамни кўздан кечираман.

Мен ўз вазифаларимни куннинг биринчи қисмида бошлаб, кўп ишларни бажаришга улгураман. Шунда кечқурун оиламга вақт ажратишга бемалол улгураман.

 

8. Мақсадли вақт

Мақсад борми? Уни амалга ошириш керак. Ишларни кўриб чиқиш, режалаштириш ва бажариш учун куннинг биринчи қисмидан яхши вақт йўқ. Сиз бу ҳафтада амалга оширишингиз лозим бўлган бир мақсадга эга бўлишингиз керак.

Ҳар куни эрталаб мақсадингиз сари олиб борувчи бирор ишни амалга оширишингиз керак. Бу эрталаб бажарган биринчи ишингиз бўлиши мақсадга мувофиқ.

 

9. Қатнов

Ҳеч ким эрталабки тиғиз вақтда ҳаракатланишни ёқтирмайди. Ишга эртароқ қатнашга одатланинг, шунда ишга етиб олишингиз ҳам енгиллашади. Ўзингиз ҳам вақтингизни тежаб, ишларингизни тезроқ бажаришнинг уддасидан чиқасиз. Велосипедда қатнасангиз ёки уйдан ишласангиз, ундан-да яхши.

 

10. Учрашувлар

Эрта турсангиз, эрталабки учрашувларингизни ўз вақтида тугаллайсиз. Шу билан бирга уларга тайёрланишга ҳам улгурасиз.

"Сўфитўрғай" режимига ўтиш

Кескин ўзгариш қилманг. Режимни аста-секинлик билан ўзгартиринг, одатдагидан 15-30 дақиқа эртароқ уйғонинг. Бир неча кун ичида бунга кўникинг. Шундан кейин яна 15-30 дақиқага қисқартиринг. Ўзингиз мақсад қилган вақтга етгунга қадар шундай қилишда давом этинг.

Эртароқ ухлашга ётинг. Қўнғироқли соатингизни каравотдан узоқроққа қўйинг. Шунда уни ўчириш учун ўрнингиздан туришингизга тўғри келади.

Қўнғироқни ўчирдингизми, дарҳол ётоқхонадан чиқинг, ўринга қайта ёта кўрманг. Ўзингизни хонадан чиқишга мажбур қилинг. Ваннахонага кириб ювининг ва янги кунни қарши олинг.

Асосли сабаб топинг. Эрталаб муҳим бир иш бажаришни ўзингизга одат қилинг. Бундай одат сизга ўрнингиздан туришга туртки беради.

Ўзингизни мукофотланг. Қайноқ қаҳва ёки чой ичиш, китоб мутолаа қилиш, қуёш чиқишини кузатиш, бадантарбия билан шуғулланиш ва бошқалар. Бу сизнинг тонгингиз ёқимли бошланишига сабаб бўла олади.

Яндекс.Метрика