Google бепул мобил интернет орқали миллиард фойдаланувчини жалб қилади

09.11.2012

1801

Google корпорацияси Филиппинда «оддий» телефонларнинг эгаларига интернет-компаниянинг сервисларидан бепул фойдаланиш имконини берадиган дастурни ишга туширди. Бу ҳақда 8 ноябрь куни Reuters ахборот агентлиги хабар бермоқда.

Globe Telecom мобил операторининг имкониятлари чекланган, бироқ интернетга кириш имконини берадиган телефонга эга абонентлари Google’нинг Gmail почтаси ва Google+ ижтимоий тармоғи каби хизматларидан бепул фойдаланишлари мумкин. Бундан ташқари, абонентлари Google қидирув тизими орқали топилган сайтларга ҳам бепул киришлари мумкин бўлади. Бошқа саҳифаларни очишга уринишса, фойдаланувчилар мобил интернет учун оператор тарифи бўйича тўловни амалга оширишлари кераклиги ҳақида хабарни кўришади.

Goolge маҳсулотлари менежери Абдулкарим Мардинийнинг сўзларига кўра, ушбу дастур интернет билан танишувни компьютерлар билан эмас, мобил телефон орқали амалга оширадиган «кейинги бир миллиард интернет-фойдаланувчилар»га мўлжалланган.

Агентликнинг қайд этишича, сўнгги бир йил давомида Филиппинда смартфон эгаларининг сони уч баравар ошгани кузатилмоқда. Айни вақтда, «ақлли телефонлар» мамлакатда фойдаланилаётган мобиль қурилмаларнинг бор-йўғи 24 фоизини ташкил этади.

Жаҳон бўйича интернет фойдаланувчиларнинг умумий сони икки миллиард кишидан ошади.