Grafik kalitni beshta urinishda buzish mumkin!

Android-смартфонлар соҳибларининг деярли 40 фоизи ўз қурилмаларини график калит орқали «қулфлаб» қўйишади. Хўш, бу усул қанчалик ишончли ўзи?

Ланкастер университети (Буюк Британия), Бат университети (Буюк Британия) ва Шимоли-ғарбий университет (Хитой) мутахассислари бу борада махсус тадқиқот ўтказишди. Натижада аниқланишича, график калит смартфонни бегона қўллардан тўлиқ ҳимоялай олмас экан, деб ёзади TechRadar.

Мутахассисларнинг таъкидлашларича, бармоқ изи сканери, пароль ёки рақамли PIN-код смартфонни график калитдан кўра ишончлироқ муҳофаза қилар экан.

Агар ёвуз ниятли киши рўпарангизда ўтириб олиб, сизнинг ўз смартфонингизни блокдан чиқариш жараёнингизни видеога тушириб қўйса, кейин гаджетингизни қўлга киритиб олса, калитни ўзи топиб очиши унчалик ҳам қийин бўлмайди. Бунинг учун, блокдан чиқаришингиз жараёнида у экранингизни кўриб туриши ҳам шарт эмас. Шунчаки, рўпарангизда гўёки ўз телефонида ўйин ўйнаётгандек бўлиб ўтиради-да, кейин видеодаги ҳаракатларингизни таниб олувчи махсус дастур орқали график калитингизни аниқлайди.

Қизиғи шундаки, график калит қанчалик мураккаб бўлса, дастур уни шунчалик катта аниқликда таниб олар экан!

Мазкур дастурнинг яна бир хусусияти – ишлаш жараёнида у калитларни аниқлаш технологиясини ривожлантириб, яъни, тажрибаси ортиб боради ва ҳар бир навбатдаги қадамида ҳаракатларни олдингиларидан кўра аниқроқ таниб олади.

Мутахассисларнинг аниқлашларича, дастур ҳаракатларни таниб олиши учун 2,5 метргача узоқликдан видеога олиш мумкин. Шу тариқа, жамоат жойларида смартфонингизни блокдан чиқариш учун график калитдан фойдаланганингизда, бу қулфингизни бузиб очиш эҳтимоли юқори.

Тажрибада мутахассислар 120 та турлича график калит устида иш олиб боришди. Буни қарангки, 95% ҳолатда кўпи билан бешта уринишда қулфни очиш комбинациясини тўғри танлай олишди. Табиийки, олимлар мазкур дастур номини маълум қилишмаган.

«Мобил қулфбузарлик»нинг бу туридан фойдаланиш учун, табиийки, жиноятчи кимнинг смартфонини ўмаришни олдиндан режалаштириб, уни кузатиб бориши ҳам лозим бўлади. Демак, график калитга буткул ишониб қолмасдан, қурилмангизнинг ўзига ҳам эҳтиёт бўлишингиз лозим. Шунингдек, экранда график калитни чизаётганингизда иккинчи қўлингиз кафти билан уни ёпиб турсангиз ҳам зарар қилмайди.


Комментарии (0) | Добавить: 10.02.2017
Faqat ro'yhatdan o'tgan foydalanuvchilar izoh qoldirishi mumkin. Marhamat ro'yhatdan o'ting!
[ Регистрация | Kirish ]