Oxirgi ikki hafta mobaynida Hindistonda kamida 220 kishi jazirama qurboni bo‘ldi, 330 milliondan ortiq kishi ichimlik suvi tanqisligidan aziyat chekmoqda. Bu haqda 23-aprel, shanba kuni mamlakat sog‘liqni saqlash vazirligi ma’lum qildi, deb xabar bermoqda “TASS”.
“Eng og‘ir holat ikki hafta ichida kamida 220 kishi nobud bo‘lgan Odishya, Telangana va Andxra-Pradesh shtatlarida kuzatilmoqda. Ichimlik suvi yetishmasligidan 256 ta okrugdagi aholi aziyat chekmoqda. Bu hududlarda 330 milliondan oshiq kishi, ya’ni mamlakat aholisining chorak qismi istiqomat qiladi”, — deb ta’kidlanadi vazirlik bayonotida.
Haddan ortiq issiq harorat Hindistonning aksariyat qismida kuzatilmoqda. Odishyada esa mamlakat bo‘yicha eng yuqori harorat qayd etilgan: oxirgi besh kun ichida mutttasil ko‘tarilib borib, 23-aprel, shanba kuni 47,5 darajani tashkil etgan.
Hindiston metereologiya departamenti bashoratiga ko‘ra, joriy yildagi yoz keyingi 100 yil mobaynidagi eng jaziramalisi bo‘lishi mumkin. Janubda maksimal harorat 48 darajadan oshishi kutilmoqda.