HTC апрель ойидан 799 долларлик Vive шлемларини сотишни бошлайди

22.02.2016

1975

HTC Vive шлемларига буюртмалар 2016 йилнинг 29 февралидан қабул қилинади, апрелдан эса ускуна етказиб бериш бошланади. Битта тўпламнинг нархи 799 долларни ташкил этади.

Тўпламда шлемдан ташқари иккита (ҳар бир қўл учун биттадан) контроллер (инг. “назоратчи”) ва фойдаланувчининг хонадаги жойлашувини аниқлаш учун иккита асос станцияси бор. Job Simulator ва Fantastiс Contraptor бошланғич ўйинлари ҳам шу тўпламдан жой олган, деб хабар беради Gizmodo.

Шлемда 90 Гц тезликда янгиланадиган 1920 га 1080 пикселли иккита дисплей, шунингдек, смартфонлардан қўнғироқ қабул қилиш имконини берувчи Bluetooth ускунаси ўрнатилган.

Лекин HTC Vive нинг сотувга чиқиши ҳақидаги хабар Mobile World Congress пресс-релизининг кутилмаганда тарқалиб кетиши асосида пайдо бўлди. Компания бу ҳақда ҳали расмий эълон бермаган.

HTC Vive га энг яқин рақиб Facebook ка тегишли Oculus VR компаниясининг Oculus Rift шлемидир. У буюртмаларни 7 январдан қабул қилган, сотуви эса 599 доллар нархда март ойида бошланади.