Испанияда 100 минг тонна автомобиль шиналари ёнмоқда

15.05.2016

1124

Испания ҳукумати Сесенья ва Вальдеморо муниципалитетларида истиқомат қилувчи ўн минглаб аҳолини кўчиришга қарор қилди. Бунга, аҳоли тураржойлари ўртасида жойлашган йирик ишлатилган автомобиль шиналари уюмида вужудга келган ёнғин сабаб бўлган. У ерда 100 мингдан ортиқ шина тўплангани хабар қилинмоқда. 

Расмий маълумотларга биноан, ёнғин натижасида ҳеч ким жабрланмаган, бироқ ҳудуд устида пайдо бўлаётган заҳарли тутун булутларини шамол атрофга тарқатмоқда. 

Айни вақтда ёнғин сабаблари ўрганилмоқда, экспертлар шиналар уюмига қасддан ўт қўйилганини ҳам инкор этишмаяпти. Чунки, бир неча кун аввал, минтақада ёмғирли об-ҳаво ҳукм сурган. 

Воқеа жойида ўт ўчириш бўлинмалари ва вертолётлар ёрдамида ёнғинни бартараф этиш чоралари кўрилмоқда. Маҳаллий ҳукумат вакилларининг айтишларича, бунинг учун бир неча кун талаб этилади. 

Шифокорларнинг ташқарига чиқмаслик тўғрисидаги тавсияларига қарамай, ҳудудда яшовчи аҳоли вакиллари сайрга чиқиб, турли суратларни ижтимоий тармоқларга жойлаштириш билан бандлар.