Bizda faqat
original taronalar

JAVA 22 dollarga ijaraga olgan “Dunyo sening tog‘angmas” qo‘shig‘ini YouTube’dan o‘chirib yuborish sababini ochiqladi (video)


“Dunyo sening tog‘angmas” qo‘shig‘i bilan mashhurlikka erishgan Java qisqa fursatda 13 000 000 dan ortiq tomosha qilingan qo‘shig‘ini YouTube tarmog‘idan o‘chirib yuborganini ma’lum qildi.
Java bu haqida “Daryo” muxbiri Feruz Muhammadga bergan intervyusida gapirib berdi.
Odamlar orasidagi har xil mish-mishlarga barham bermoqchiman. Sabringiz yetib, gaplarimni yaxshilab tinglasangiz hammasini bilib olasizlar.
Internetda tayyor musiqalar sotiladi. Kava ismli ukrainalik bastakor boladan “Dunyo sening tog‘angmas” qo‘shig‘i musiqasini ijaraga sotib olgan edim. Ya’ni musiqani tag-tugi bilan emas, ma’lum bir vaqt davomida foydalanish uchun ijaraga sotib olganman. Bu amaliyotni internetni yaxshi biladiganlar yaxshi tushunadi. Biroz vaqt o‘tib, bu qo‘shiq juda ham katta mashhurlikka erishgandan so‘ng, bu musiqani boshqa birov Kavadan katta pulga sotib olibdi.

O‘sha sotib olgan odam menga aloqaga chiqib, “Kavadan musiqani sotib oldim, bu musiqadan faqat mening roziligim bilan foydalana olasan. Mening ikkita shartimga ko‘nsang, musiqadan foydalanishing mumkin”, dedi.

“Agar men bilan ishlaydigan bo‘lsang, daromadning 70 ga 30 hisobida kelishamiz. Bundan tashqari senga 1 000 AQSh dollari beraman va qo‘shiqning so‘zi, g‘oyasi, ya’ni mualliflik huquqi to‘liq menga o‘tadi”, dedi.

Men u odamning ikkala shartiga ham ko‘nmadim va YouTube’dan qo‘shiqni o‘chirib yubordim.

Odamlar orasida tarqalgan “Dunyo sening tog‘angmas” qo‘shig‘i o‘g‘irlangan”, degan gaplarning barchasi bo‘hton gaplar. Men shunchaki musiqani ijaraga olganman. AQSh, Yevropa yoki Rossiyada ham bunday usuldan foydalanishadi.

Lekin ashula 100 foiz o‘zimniki. Mualliflik huquqini ham rasmiylashtirib qo‘yganman.

Xudo xohlasa avgust oyida klip suratga olish ishlarini boshlaymiz. Qo‘shiqqa esa yangi musiqa yoziladi. O‘chirib tashlaganim uchun ortiqcha siqilganim yo‘q. Hammasi joyida.

“Dunyo sening tog‘angmas” qo‘shig‘i musiqasini 22 dollarga sotib olgandim. Musiqani to‘liq sotib olgan odamdan “musiqani sotib olaman, qancha so‘raysan”, deganimda u sotmasligini ma’lum qildi.

Java, xonanda

Ma’lumot uchun, asl ismi Javohir bo‘lgan, ayni vaqtda Java taxallusi bilan ijod qilayotgan xonanda Jizzax viloyatida dunyoga kelgan. 2010-2017-yillarda o‘tkazilgan Respublika ko‘rik tanlovlarining hammasida 1-o‘rinni egallab, O‘zbekiston davlat Konservatoriyasiga imtiyoz asosida o‘qishga qabul qilingan.