"ЛОЛА" & "НЕНЖАЕ"! КИМ ЎҒРИ?

10.01.2016

2223

Лола». Ўтган йилнинг энг машҳур хити! Энг шов-шувли хити! Энг кўп янграган хити! Уни илк бор Баҳром Назаров ижросида 2014-йилнинг ноябрида тингладик. Кейин маълум бўлишича, шогирд устозининг студиясига келиб, бу қўшиқни ундан берухсат олиб, ўз ижросида куйлаган. Ҳар ҳолда, Озодбекка кўра, Баҳром шундай номақбул иш қилган. Назарбеков “Лола”ни ўзи куйлади ва альбомига киритди. Қўшиқ жуда тез фурсатда оммалашди. Озодбек шоша-пиша ё шунчаки қўл учида “клипсимон” видео ҳам суратга олдирди. Саъдулла Абдуллаевнинг тоғдаги дачасида суратга олинган бу клип у қадар томошабоп бўлмади. Бироқ, қўшиқ таъсири минглаб қалбларни тўлқинлантира олди. Озодбекнинг апрел концертларида ҳам “Лола” бош қўшиққа айланди. “Лола” сўнгги бор омма олдида ўтган йилнинг ноябрида, Баҳромнинг илк яккахон концертида устози томонидан “Истиқлол”да куйланди. Бироқ, энг катта шов-шув бир неча кун олдин яъни, янги йилнинг иккинчи ҳафтасида бошланди! Қизиқувчан мухлислар интернетни ковлаб, “Лола” мусиқасига ўхшаш, аниқроқ айтганда, асл нусхасини топгандай бўлишди. Талай сайтлар эса бу борада жар сола бошлади. Ким Озодбекни “плагиат”да айбласа, бошқа биров “қароқчи” ҳинд бастакорлари дейди! Куни кеча телеграм орқали шоубизнинг бир вакили “Лола“га ўхшаш ҳиндча қўшиқнинг интернетдаги манзилини юборди ва уни тинглаб кўришимизни айтди. Қизиқ, ўғри ким? Бўладиган иш  бўлди. Бироқ, виждон-чи? Унинг адолат истаги-чи? “Ўғри”ни аниқлашда шошмаймиз. Келинг, яхшиси, анализ қиламиз. Дарвоқе, бундай ҳоллар ўзбек шоу-бизнесида биринчиси эмас (охиргиси бўлмаса ҳам керак!). “Қароқчи”лар камми? Озодбек тугул, машҳурлиги ундан анчайин баланд “катта-катта” юлдузлар репертуарида ҳам ўғирланган хитлар талай. Ёш “юлдузча”ларни айтмаса ҳам бўлади. Энг қизиғи, халқ артисти ижодида “пират” қўшиқларнинг учраши тезроқ кўзга ташланади, муҳокамага дучор бўлади...ва мана шундай шов-шувлар кўтарилади!  

Шов-шув анализ:

1.“Лола” видеоси “youtube”га 2015 йилнинг, 6-январида жойлаштирилган. Манба: ризанова.уз.

   Л.В.Ганесан басталаган “Ненжае” қўшиғининг видеоси 2015-йилнинг, 9-январида жойлаштирилган. Манба: Sony Music компаниясининг Ҳиндистондаги тармоғи.

2. “Лола” – Озодбек Назарбековнинг Бобур ғазаллари билан куйлайган қўшиқлар тўпламига киритилган.

“Нанжае” – тамил тилидаги “Панивизҳум Нилаву” фильмининг расмий саундтреки саналади. Ушбу картина эса 2014-йилнинг 21-мартида премьера қилинган. Картина қўшиқлари жамланган махсус аудио-альбом тақдимоти эса фильм премьерасидан бир неча кунлан олдин Ҳиндистонда бўлиб ўтган. “Нанжае”нинг хомаки видеоси, яъни қўшиқ матни кўрсатилган “караоке” варианти 2014-йилнинг 17-мартида  “youtube” тармоғидан жой олган.

Хуллас, бу икки қўшиқ матни мазмунан ва талаффуз жиҳатидан ҳар қанча фарқ қилмасин, мусиқаси бир тухумдан яралган эгизак мисоли ўхшаш!

Ўғри ким? Бастакорлардан қай бири мард бўлиб, ўз муаллифлик ҳуқуқини ҳимоя қила олади? Қўшиқнинг асл нусхаси ўзбекникими ё ҳиндники? Бу борада аниқ тўхтамга келиш учун икки бастакорни ҳам тинглашимиз даркор. Ҳиндистонлик бастакорнинг интернетдаги электрон манзилини топиб, унга бир неча саволлар йўлладик. Жавоб кутяпмиз. Сўнгра, ўзимизнинг бастакорга мурожаат қиламиз. Ўйлаймизки, масала албатта ойдинлашади!

Жасур ҲАМРОЕВ