"NAVO" TVM reytingiga chiqaoladimi?

"Наво” кундан кунга томошабинлар ишончини йўқотмоқда. Мусиқий телеканаллар ёпилиши ортидан аслида гуллаб-кетиши ўрнига ҳануз куз хазонрезгисида қолаётган каналга ёрдам керакдек...Бир қарасанг, ҳатто Мадоннанинг эсидан ҳам чиқиб кетган 80-йиллардаги эски клипларини намойиш этса, гоҳ Жастин Тимберлейкнинг ареналардаги шоуларини тақдим этади, гоҳ Ғарб телеканаллари аллақачон унутиб юборган, сийқаси чиққан сифатсиз хориж клиплари ила ўтган асрнинг ностальгиясини  юртдошларимиз ёдига солишга уринади... Эфирнинг аниқ бир мундарижаси йўқ. Фирибгарлардан ҳам огоҳлантиради, телеканал.  Ё "Наво”га клипингни жойлаштириб бераман” деганлар шу қадар кўпайиб кетган ё қандайдир пиарнинг "емаган” тури бу!  "Клипнинг бир марта айланиши 110 доллар. Клип суратга олишга ҳам қўрқиб қолдик. Шунча сарф-харажат етмаганидек, клипнинг телеканал форматига мос ё мос эмаслиги важи туғдирадиган хавотир, яна 4-5 дақиқалик клипнинг атиги бир марта намойиши учун 110 доллар ҳақ тўлаш – унча-мунча санъаткорни ўйлантириб қўяди” дейди, исми сир қолишини истаган машҳур бир хонанда.

Ҳақиқатан ҳам гонорари фалон пул турадиган, кунма-кун тўйда юриб, яхшигина даромад топадиган хонандаларнинг аксарияти "Наво” офисига бориб, клип айлантириш учун пул тўлашни ўзига эп кўрмайди ё шунчаки канал эфирини ўз рейтингига мос кўрмайди.  Шунданми, "Наво” намойишлари жуда қашшоқ аҳволда қолмоқда. Бир-бир таниқли, исталган юлдузлар чеҳрасини кўриб қолмасанг, қолганини томоша қилиш учун катта сабр ё сероб вақт, ё бекорчилик  бўлиши керак. Асаб бузилишининг олдини олиш учун шунчаки телевизор пультини олиб, бошқа каналга ўтиб кетишга мажбур бўласиз.

"ТОП 10 ХИТ” – энг яхши клиплар ўнталиги ҳақидаги ролик айланаётганига анча бўлиб қолди. Бироқ, на дастурдан дарак бор, на яхши клипларнинг ҳеч бўлмаса бештасидан!

"Наво” қачонгача кулгуга қолмоқчи? Дунё билан Янги йилни нишонлаб, шарқона Янги йил – "Наврўз”дан ҳам ўтдик...Бироқ, янгиланишдан ҳануз хабар йўқ! Баҳор келиб, бутун олам уйғонди... "Наво” уйғониши учун яна қанча вақт керак? Жавобни кейинги йилнинг "Наврўз”ида олсак керак... Яна ким билади, дейсиз?