У нас есть только
оригинальные песни

O'zbekistonlik erkin kurashchi Jamshid Kenjaev tungi klubda pichoqlandi

calendar 10.08.2018
2042

Аввалроқ, 8 август куни Юнусобод туманидаги “Aurum” тунги клубида жанжал чиқиб, Жамшид исмли меҳмон олган тан жароҳатлари натижасида ҳалок бўлгани ҳақида хабар берган эдик.
 
Мазкур воқеада қурбон бўлган Жамшид Кенжаев эркин курашчи, халқаро тоифадаги спорт устаси ҳисобланган. Унинг ўлимига ўзи билан олиб келган пичоқ сабаб бўлган. Жамшид тунги клубга пичоқ билан кирмоқчи бўлган, аммо қўриқчилар бунга йўл қўйишмагандан кейин спортчи уларнинг бирига мушт тушурган, шундан сўнг катта жанжал бошланган.
 
Жамшиднинг ёнида дўстлари ҳам бўлган, лекин улар калтаклангач, дўстларини ташлаб қочишган. Жамшид Кенжаев эса пичоқлангандан сўнг ерда 30 дақиқа-ча ётиб қолган. Тез тиббий ёрдам машинаси ўз вақтида етиб келмаган. Воқеа 8 август куни соат 23:45 ларда рўй берган.
 
Ушбу нохуш ҳолат юзасидан Ўзбекистон Республикаси Бош прокуратураси расмий маълумот берди.
 
Унга кўра, Юнусобод тумани, Абдулла Қодирий кўчаси, 1-а уйда жойлашган “Aurum” тунги клуби кириш эшиги олдида Ж.Кенжаев тунги клуб қўриқчилари Ш.Ильясов ва А.Мирзаев билан ўзаро жанжаллашиб, ёнида бўлган ошхона пичоғи билан Ш.Ильясовга ва А.Мирзаевга санчиб кесилган тан жароҳатлари етказган.
 
Жанжал давомида воқеа жойида бўлган “Aurum” тунги клубида қўриқловчи ёрдамчи Ш.Қиличов фуқаро Ж.Кенжаевни қўлидан ошхона пичоғини тортиб олиб, унга санчиб кесилган тан жароҳатлари етказган. Тан жароҳатлари олган Ш.Ильясов 7-сонли ШКШга, А.Мирзаев 1-сонли Республика клиник шифохонасига ётқизилган.
 
Олган тан жароҳатлари билан Жамшид Кенжаев Юнусобод туманидаги 7-сонли ШКШга ётқизилиб, тез тиббий ёрдам кўрсатилса-да, етказилган тан жароҳатлари натижасида вафот этган.
 
Мазкур ҳолат юзасидан кеча, 9 август куни Тошкент шаҳар прокуратураси томонидан Ш.Қиличовга нисбатан ЖКнинг 25, 97-моддаси 1-қисми билан жиноят иши қўзғатилиб, у ЖПКнинг 221-моддаси тартибида ушланган.
 
Ҳозирда жиноят иши юзасидан дастлабки тергов ҳаракатлари Тошкент шаҳар прокуратураси Ўта оғир жиноятларни тергов қилиш бўлими томонидан олиб борилмоқда.

Суннатилла Абдуллаев

Яндекс.Метрика