Бангладеш ҳукумати кучли ёмғир ва сув тошқинлари билан бирга келувчи «Роану» тропик циклони яқинлашаётгани туфайли мамлакат жанубидаги 2,1 миллион фуқарони эвакуация қилмоқда. Бу ҳақида Синьхуа агентлиги хабар берди.
Бангладешнинг метеорологик бошқармасининг прогнозига кўра, табиий офат 21 май куни мамлакатнинг Мьянма билан чегарадош ҳудудларини қамраб олади. Бангладешда 10 баллик хавф тизимининг еттинчи кўрсаткичи эълон қилинган.
Ҳукумат вакиллари аҳолининг эвакуация қилиниши ҳақида хабар тарқатишган ва кема эгаларига уларни хавфсиз туманларга кўчиришни маслаҳат беришган. Табиий офатлар оқибатларини олдини олиш вазирлигининг вакили Камол Шоҳнинг сўзларига кўра, кўчирилувчи аҳоли учун минглаб бошпаналар тайёрланган. «Биз маҳаллий ҳукумат вакилларидан воқеага қаттиқ эътибор қаратишларини сўрадик, шунинг учун 2,1 миллион фуқаронинг кўчирилиши тўлиқ амалга оширилади», - деди вазирлик вакили.