Rossiyada ilk bor saratondan davolanish kursini to'liq o'tagan ayol farzandli bo'ldi

Rossiyada ilk bor saratondan davolanish kursini to'liq o'tagan ayol farzandli bo'ldi. Farzand ko'rishga ko'mak beruvchi texnologiya Obninskdagi tibbiy radiologik ilmiy markaz mutaxassislari tomonidan ishlab chiqildi. Ushbu ishlanmada dunyoda ilk bor vitrifikatsiya — to'qimalarni tezda muzlatish usuli qo'llanildi. Bu haqda markazning yangi tibbiy texnologiyalar bo'limi rahbari Marina Kiselyova TASS nashriga ma'lum qilgan.

"Bemor 2010 yilda Obninskdagi radiologik markazga qalqonsimon bez saratoni bilan murojaat qilgan edi. Unga "saratonning to'rtinchi bosqichi” tashxisi qo'yilib, jarrohlik amaliyoti o'tkazildi. Jarrohlik amaliyotidan so'ng ayolning farzand ko'rish salohiyatiga salbiy ta'sir ko'rsatuvchi radioyodoterapiya o'tkazildi. Bundan avval esa uning tuxumdonidan genetik material olinib, darhol muzlatib qo'yildi (vitrifikatsiyalandi)”, deydi Kiselyova.

Oradan uch yil o'tib, ayoldagi saratonning qaytalanish xavfi bo'lgan davr nihoyasiga etdi va unga tuxumdon vazifasini tiklovchi sog'lom to'qimalari qayta o'tqazildi. Natijada ayol tuxumdoniga etishgan to'rt embrion olinib, ularning ikkitasi EKO usulida urug'lantirildi. Qolgan ikkisi esa ayol yana homilador bo'lish istagini bildirgan taqdirda foydalanish uchun muzlatib qo'yildi.

28 yoshli ayol 19 daqiqa davom etgan jarrohlik amaliyoti yordamida o'g'il farzandini dunyoga keltirdi. Go'dakning vazni 3400 gramm, bo'yi esa 52 santimetr, salomatligi borasidagi barcha ko'rsatkichlar me'yorida.