Rossiyada qurilishlardagi chet ellik ishchilar sonini cheklash masalasi muhokama qilinmoqda

Rossiya Mehnat vazirligi mamlakat qurilish maydonlaridagi xorijlik ishchilar sonini 65 foizdan oshirmaslik taklifini bildirdi. Ekspertlarning tasdiqlashicha, mazkur tartib sohaga katta zarar etkazmaydi.

Mehnat vazirligi taklifiga ko'ra, 2016 yildan qurilishlardagi chet ellik ishchilar ulushi umumiy ishchilar sonining 65 foizidan ortib ketmasligi kerak. Mazkur qaror loyihasi regulation.gov.ru saytiga muhokamalar uchun joylashtirildi.

Boshqa sohalarda esa bunday cheklovlar allaqachon o'rnatilgan. Masalan, alkogol va tamaki mahsulotlar savdosida bu ko'rsatkich 15 foizni tashkil etadi.

Qaror loyihasida qayd etilishicha, Rossiya Qurilish vazirligi 2016 yilda qurilishlar hajmining kamayishi munosabati bilan ishdan bo'shatiluvchi Rossiya Federatsiyasi fuqarolari hisobiga ishchilar sonini qayta taqsimlash, xorijlik ishchilar sonini kamaytirish va qurilish sohasida chet ellik ishchilar ulushini 65 foiz hajmda belgilash vazifasi yuklanadi.

"Shu bilan birga, mehnat muhojirlarini noqonuniy ravishda yollaganlik uchun Ma'muriy huquqbuzarlik to'g'risidagi kodeksga jiddiy jarimalarni kiritish ko'rib chiqilmoqda”, – deydi Yagona migratsion xizmat yuristi Bahrom Ismailov.

Moskva va Sankt-Peterburg shaharlarida yuridik shaxslarga bir ishchi uchun 200 mingdan 1 mln rublgacha (taxminan 3-15 ming dollar), muhojirlarning o'zlariga esa 5-7 ming rubl (taxminan 75-105 dollar) jarima belgilanadi. Mansabdor shaxs besh yilgacha ozodlikdan mahrum qilish jazosiga ham tortilishi mumkin.