Rossiyaning "Silmash" kompaniyasi 2015 yilda O'zbekistonda Chorvoq GESi modernizatsiyasini tugalladi

17.01.2016

2496

Rossiyaning «Silovye mashiny» kompaniyasi 2015 yilda O'zbekistonning Toshkent viloyatida 56,5 mln dollarlik loyiha - Chorvoq GESi modernizatsiyasini tugatdi. Bu haqda O'zbekiston prezidenti Islom Karimov 2015 yil yakunlariga bag'ishlangan hukumat yig'ilishida qilgan ma'ruzasida aytib o'tgan.

2012 yilning may oyida «Silovye mashiny» aktsiyadorlik kompaniyasi «Kaskad O'rta-Chirchiq GES» unitar korxonasi bilan to'rtta gidro elektr stantsiyalarini ta'mirlash bo'yicha shartnoma imzolagandi.

Chorvoq GES uskunalarini almashtirish natijasida mazkur elektr inshootining quvvati 45,5 MVtga etishi va yiliga qo'shimcha 120 million kVt-ch elektr energiya ishlab chiqarish imkoniyatini yaratish ko'zda tutilgandi.

Loyihani moliyalashtirish uchun sarflanadigan 56,5 million dollarning 35 million dollari O'zbekiston tiklanish va taraqqiyot jamg'armasi hisobidan, «O'zbekenergo» DAK mablag'lari hisobidan qoplangan.

Shartnomani amalga oshirish muddati uch yil qilib belgilangandi.

Chorvoq GES Chirchiq-Bo'zsuv kaskadining tarkibidagi asosiy, va eng katta quvvatli gidroelektrostantsiyadir (620 MVt).

Bugungi kunda O'zbekiston energetika tizimida umumiy quvvati 12,4 ming MVt dan ortiq bo'lgan 45 ta elektrostantsiya ishlaydi, O'zbekenergo DAK dagi 16ta elektrostantsiyalarning jami quvvati 12,04 ming MVt.

"O'zbekenergo"ning gidroelektroenergiya ishlab chiqaruvchi korxonalari ichida Farhod GES va Toshkent viloyatidagi 5ta GES kaskadlari bo'lib, ko'zda tutilgan quvvati 1973 MVt.

Elektr energiyaning qolgan qismini sanoat korxonalarining musaqil issiqlik elektr stantsiyalari hamda Qishloq va suv xo'jaligi vazirligi tizimiga kiruvchi kichik GESlar ishlab chiqaradi. Elektr energiyasini ishlab chiqarishning salohiyati 56-57 milliard kVt.soat.