Rustam Qosimjonov Jahon kubogini tark etdi

Ozarbayjon poytaxti Boku shahrida shaxmat bo'yicha Jahon kubogi davom etmoqda. Dunyoning kuchli 128 nafar shaxmatchisi dona surayotgan yilning ushbu nufuzli musobaqasi olimpiya tizimida o'tkazilib, har bir bosqichdan so'ng mag'lubiyatga uchragan ishtirokchi turnirni tark etadi.

Jahon kubogida 35-raqam ostida tasniflangan 17-jahon chempioni Rustam Qosimjonov ham 1/64 final bosqichidayoq musobaqani tark etdi. Reytingda o'zidan ancha pastda turgan kanadalik Aleksey Kovalevga qarshi kechgan hal qiluvchi uchinchi partiyada u mag'lubiyat alamini totib ko'rdi. 

Bundan avvalgi ikki partiyada durang natija qayd etilgandi. Qosimjonovni Jahon kubogidan chiqarib yuborgan Kovalev endi 1/32 final bosqichida argentinalik Sandro Mareko bilan hisob-kitob qiladi.

Eslatib o'tamiz, Jahon kubogining umumiy mukofot jamg'armasi 1 million 600 ming dollarni tashkil etadi. G'olib shaxmatchi 96 ming dollarga ega bo'ladi. Vitse-chempion 64, yarim finalchilar 40, chorak finalga etib kelgan grossmeysterlar esa 28 ming dollarga o'z hamyonlarini boyitib olishadi.