Рўзғордаги 5 муаммонинг оддий ечими

28.11.2016

1869

Рўзғордаги майда нохушликлар кайфиятимизга таъсир қила олмайди.Чунки биз уларни бартараф қилиш йўлини яхши биламиз. Бошлаймиз!

Девордаги чизиқлар

Айтайлик, фарзандингиз девордаги гулқоғозларга фломастер биланчизиб қўйди. Сув асосида тайёрланган фломастер изларини ўчириш осонроқ. Асоси спиртдан иборатлариники эса қийинроқ. Фломастерлар қадоғидаги ёзувни диққат билан ўқинг, унда маҳсулотнинг таркиби аниқ ёзилган бўлиши керак. Агар гулқоғозга сув асосли фломастер билан чизилган бўлса, пахта толали матони перекис-водород эритмасида ҳўллаб, чизиқларнинг устидан то улар ўчиб кетгунча эҳтиёткорлик билан юрғизиб чиқинг (марказдан четга қараб йўналтиринг). «Спиртли» фломастерда чизилганларини эса тиббий спиртга ҳўлланган пахта ёрдамида ўчиришингиз мумкин.

Муҳим! Кўзга ташланадиган жойдаги чизиқларни ўчиришдан аввалшкаф ёки диван ортидаги пана жойда танлаган воситангизни қўллабкўринг.

Линолеумга зелёнка тўкилиб кетса…

Тўкилган заҳоти уни бирон матога эҳтиёткорлик билан шимдириб олинг, токи полга ёйилиб кетмасин. Агар зелёнка қуриб, линолеумга сингиб кетишга улгурган бўлса, уни бензин ёки керосин воситасида ўчиришга ҳаракат қилиб кўринг. Латтага бензин ёки керосин қуйиб, доғ устида 10 дақиқа қолдиринг, кейин секингина артиб олинг. Муаммони исталган кислородли оқартувчи восита (кислородный отбеливатель) воситаси ҳам ҳал қилиш мумкин. Уни доғнинг устига сепиб, устидан озгина сув томизинг ва 30 дақиқага шу ҳолда ивитиб қўйинг. Кейин эски тиш чўткаси ёрдамида яхшилаб ишқалаб, сўнг латта билан артиб олинг.

Жун матодан тикилган кийимлар ювилгач киришиб қолса...

Агар севимли жемперингиз ювгандан кейин оз-моз чўзилган бўлса, соч учун мўлжалланган кондиционер қўшилган илиқ сувда ювинг. Кейин жемпер ҳўллигида унга керакли шаклни бериб (яъни зарур даражагача чўзиб), ясси кенгликка (масалан, стол устига) ёйиб қўйинг. Агар жемпер яхшигина киришган бўлса, унга озгина сув сепиб ҳўлланг ва устига нам мато ёпган ҳолда дазмолланг. Дазмоллаш жараёнида жемперни зарур ўлчамгача тортиб боринг. Жемперни яхшилаб қуригунча дазмоллаш керак.

Ошхонадаги шкафларда нохуш ҳид пайдо бўлса...

Шкафни аввал ичкаридан, кейин ташқаридан аввалига ҳўл, кейин қуруқ латта билан артинг. Сўнг шкаф токчаларига янги лимон ёки апельсин пўстини суртинг. Буни ойига бир марта амалга оширинг.

Яна бир маслаҳат: музлаткичдаги нохуш ҳидни бартараф этиш учун пахтани аччиқ дамланган қаҳвада ҳўллаб олиб, кичкина пиёлага солинг ва музлаткич токчаларидан бирига қўйинг.

Кичкинтой диван ёки гилам устига «ёзилиб» қўйса…

Яримта лимоннинг сувида ҳўлланган губка билан нам жойни яхшилаб артинг. Нохуш ҳидни йўқотишда сирка ва сув аралашмаси (1:4 нисбатда) ҳам яхши ёрдам беради. Эритмани ҳўл бўлган жойга пуркагич ёрдамида яхшилаб пурканг ва 5-10 дақиқага қолдиринг. Кейин ортиқча намликни ҳожатхона қоғозига шимдириб олинг.

Шаҳноза СОАТОВА тайёрлади