Sizga havas qilishlarini istaysizmi? Mana buning 20 siri

04.01.2017

2167

Қиз бола деган мана ундоқ қилади, бундоқ қилади, деган гапларни кўп ва хўп эшитгандирсиз. «Сенинг ёшингда мен...» дея бошланувчи ўгитлардан ҳам чарчаганингиз ростдир. Ахир ҳаммадан хар хил фикр чиқади–да. Биз эса сизга қизларнинг гули бўлиш сирларини очишга жазм этдик. Улардан воқиф экансиз, барчанинг юрагини «жиз» эттиришингизга чин дилдан ишонамиз.

1. Доимо қаддингизни баланд тутиб юринг. Букчайиш эринчоқлик белгиси саналади. Ўтирибсизми, турибсизми, доимо гавдангиз тик ушланг, ҳатто ёлғиз қолганингизда ҳам!
2. Ораста бўлинг. Ҳар куни душ қабул қилинг, кийимларнинг тозасини кийинг. Агар бехосдан либосингизга доғ тушириб қўйсангиз, дарров уни алмаштириб олинг, бунга сира эринманг. Қариндошларнинг тадбирларига хизматга юборишса, ҳар эҳтимолга қарши сумкангизга бирор қўшимча кийим солиб қўйишни унутманг.
3. Сочингизга алоҳида эътибор қаратинг. Кунига бир неча марта тарашга одатланинг. Вақти вақти билан турмагингизни тартибга солиб туринг. Одамларнинг олдида таранманг ҳам, бўянманг ҳам. Бу жуда хунук кўринади.
4. Пардознинг ҳам меъёрдагиси яхши. Қизларга ҳаддан ортиқ бўяниш ярашмайди. Нотабиий қора қошлару қип-қизил лаб бўёғи билан арзон қўғирчоққа айланасиз.  
5. Кийимининг қимматини эмас, ярашиқлисини танланг. Либосингиз вазиятга мос келсин.
6. Тўй–ҳашам ва тадбирларга ясаниб боришдан уялманг. Агар танлаган либосингиздан иккиланаётган бўлсангиз, билингки, “Тайёрланмай, ўзига қарамай келибди”, деган гапдан кўра, бошқа меҳмонлардан ясаниброқ турганингиз афзал.
7. Сўзларни тўғри талаффуз қилиб, чиройли гапиринг. Қўпол гапларни ҳеч қачон ишлатманг. Тилимиз бой. Хунук сўзларнинг ўрнига ҳамиша синонимини топиш мумкин.
8. Минғиллаб сўзлашиш сизга ярашмайди. Овозингизни баланд ҳам қўйиб юборманг. Нутқингиз равон ва сўз бойлигингиз эса кўп бўлиши учун доимо мутолаа қилинг.
9. Атрофингиздагилардан эътиборингизни қизғанманг. Акс ҳолда, сизни қуруқ олифтага чиқаришлари турган гап. Айниқса, ёши улуғ кишиларга икки карра эътиб кўрсатинг. Хушмуомалалик одатий ҳолга айлансин сиз учун. Бировларни хафа қиладиган гаплардан қочинг.
10.  Агар кимнидир жойига ўтказиб қўйиш керак бўлса, имкон қадар самимий гапиринг. Бақир–чақирга йўл қўйманг.
11. Нотаниш инсонларга ҳам ҳурмат билан муносабатда бўлинг. Одамлар сиз билан гаплашганда ўзларини енгил ҳис қилишсин. Бу осон эмасми? Унда ўз устингизда ишланг. Самимийликни ҳам ўрганиш мумкин.
12.  Миннатдорчилик билдиришни канда қилманг. Дастурхон атрофида ўзини тутиш, танишиш, жамоат жойларида юриш одобини ўрганинг.
13. Бировларнинг камчилиги ва одобсизлигини муҳокама қилиш ҳам одобсизликка киради. Ғийбатлардан қочинг. Кимдир жаҳлингизни чиқарган ёки кимдандир хафа бўлишингиз мумкин, аммо ғийбат ҳеч қачон муаммони ҳал қилмайди.
14.  Ижтимоий тармоқлардаги постларингизга ҳам эътиборли бўлинг. Кимнингдир гапи сизга тегиб кетса ҳам, ижобий фикрлигингизча қолинг.
15. Қадрингизни билинг. Яхши қиз дегани ўз фикрига эга бўлмаган, ким қаерга етакласа кетаверадиган қиз эмас. Агар қайисдир масалада ҳамсуҳбатингиз билан фикрингиз тўғри келмаса, шунчаки мавзуни ўзгартиринг. Агар сизга ёмайдиган савол беришса, унга жавоб беришингиз шарт эмас. Ҳазилга йўйинг ёки бу савол билан барчага мурожаат қилинг.
16.  Китоб ўқиган қиз ҳамиша барчанинг диққат марказида бўлади. Саводсизлик эса уят саналади. Яхши романлар, қиссалар ва ҳикоялар ўқинг.
17. Дугона танлашда адашманг. Дўстларингиз сизни пастга тортмаслиги керак.
18. Инсофли бўлинг. Транспортда ёши катталар ва болали аёлларга жой бўшатинг, ўқиш ёки ишхонангиздаги жамоат ишларидан бош тортманг.
19. Ўз хатти–ҳаракатларингиз учун масъулиятни бўйнингизга олинг. Барча кулфатларингизда бошқаларни айбламанг. Нолишни ва ўзингизни оқлаш учун баҳоналар қидиришни бас қилинг. Унутманг, сиз ўз ҳаётингизни ўзингиз қурасиз.
20. Истаган нарсангизга эришиш учун кўп меҳнат қилишингиз кераклиги доимо ёдингизда бўлсин!