Andijon shahrida yashovchi fuqaro U.G. Andijon shahar IIBga ariza bilan murojaat qilib, 2018 yil 12 yanvar kuni soat 07:00 larda yashash uyi mehmonxonasidagi televizori ustidan narxi 24.000.000 so'mlik tilla taqinchoqlari: 1 dona tilla zanjir, 1 dona uzuk, 1 dona braslet va 1 juft ziraklari noma`lum shaxs tomonidan o'g'irlab ketilganligini, o'zi izlab topa olmaganligini bildirgan. Bu haqda Andijon viloyati IIB matbuot xizmati xabar bermoqda.
Ko'rilgan tezkor choralar natijasida noma`lum shaxs Andijon tumanida istiqomat qiluvchi fuqaro A.L. bo'lib chiqdi. Olib borilgan profilaktik surishtiruv ishlari natijasida fuqaro A.L. 2018 yil 12 yanvar kuni soat 06:30 larda, U.G.ning chaqiruviga asosan yashash uyiga tez-tibbiy yordam avtomashinasida kelib, birinchi tibbiy yordam ko'rsatib chiqib ketayotib, yuqoridagi buyumlarini o'g'irlab ketganligi aniqlandi.
Mazkur holat bo'yicha Andijon shahar IIB huzuridagi TB tomonidan O'zbekiston Respublikasi Jinoyat kodeksining 169-moddasi 1-qismi bilan jinoyat ishi qo'zg'atilib, tergov harakatlari olib borilmoqda.