To'yimga 2 hafta qoldi

03.09.2017

3683

Ҳар бир қиз тўйи куни чиройли ва бетакорор кўринишни истайди. Ахир юзлаб одамларнинг нигоҳига бардош бериш, уларнинг қаршисидан бошини баланд тутиб ўтиш осон иш эканми? Албатта, бунга кўп меҳнат талаб этилади, лекин уддалаш мумкин. Келинг, вақтни бекор кетказмаймиз-да, қоғоз-қалам олиб, қилиниши лозим бўлган ишларни режалаштириб оламиз.

Икки ҳафта бор: татуаж ва «растушёвка» учун вақт топишимиз керак

Тушунамиз, кўйлак тиктириш, бозорга тушишдан вақт орттиришингиз мушкул. Бироқ тайёр тураверинг, бундан кейин ишингиз кўпайса кўпаядики, асло камаймайди. Тонгдан то бозор ёпилгунча айланавериб, оёқларингизда оёқ қолмайди, уйга қайтгач, албатта, мойчечакли ванночкалар қилиб туринг. Офтобда қорайиб кетмаслик учун эса SPF-50 деб ёзилган крем, тонал крем ёки упалардан фойдаланинг. Янги хонадонга борганингизда эса эрталабки пардоз учун вақт кетказмаслик учун татуаж ёки «растушёвка» қилдиришнинг айни пайти. Бунда қошингизни бир неча йилга етадиган қилиб бўятишингиз, кўзингизнинг устига чизиқ чиздиришингиз, лабнинг атрофига контур чизиқ чиздиришингиз ёки лабнинг ўзини бўятишингиз мумкин. Кўп қизлар қошимни тўйим куни тердираман, деб оёқ тираб туриб олишади. Биз эса бу фикрни кўпам ёқламаймиз. Масалан, баъзиларнинг қовоқ териси жуда нозик бўлади, тўй куни қош терилганида эса қовоқлар шишиб, қизариб қолади. Шунинг учун тавсиямиз бу ишни аввалроқ бажаринг, камида тўйга бир ҳафта қолганида.

Бир ҳафта қолди: теримизни тозалаймиз

Роппа-роса бир ҳафта ўтиб, визажист курсисида ўтирган бўласиз. Пардозингиз бетакрор кўриниши учун эга ҳаракатни ҳозирданоқ бошланг. Яъни юздаги қора нуқталардан халос бўлиш, ортиқча ёғланмаслиги учун ниқоблар қилиш, хуллас терини тозалаш муолажасини ўтказиш тавсия этилади.

6 кун қолди: сочимизни бўяймиз ва кестирамиз!

Келин образини яратишда сочларингизнинг аҳамияти катта. Агар уларнинг рангини ёки турмакнинг шаклини ўзгартиришга қарор қилган бўлсангиз, бу ишни никоҳ оқшомидан бир неча кун аввал бажарганингиз маъқул. Билиб бўладими, мабодо, бирор нарса кўнглингизга ўтирмаса, вазиятдан чиқиш учун етарли вақт қолиши керак-да.

5 кун қолди: киприкларни тартибга келтирамиз

Узун киприклари билан янги оила аъзоларини ҳайратда қолдиришни истаган қизлар учун киприк ёпиштириш амалиётини таклиф қиламиз. Кутилган санага беш кун қолганида бу амалиётни ўтказсангиз, елим таъсирида кўзнинг қизариши ва шишиши каби салбий ҳолатлар ўтиб кетади.

4 кун қолди: педикюр учун қулай фурсат

«Чаққонгина келиним» деб мақташлари учун оёқларингизга алоҳида эътибор беришни унутманг. Уларни парваришлашга уйда вақтингиз бўлмаса, мутахассига мурожаат қилганингиз афзал.

3 кун қолди: эпиляция ёддан чиқмасин-а...

Ўзингиз биласиз бу амалиёт тери учун катта стресс. Шундай экан тери тинчланиши учун бироз вақт талаб этилади. Баъзида амалиётдан сўнг ярачалар, терида ачишиш ва қизариш кузатилиши мумкин. Шунинг учун эпиляцияни охирги кунга қолдирманг. Вақтлироқ ҳаракатингизни қилганингиз яхши.

2 кун қолди: тажриба ўтказишни тўхтатамиз

Шу кунгача барча муолажаю амалиётларни қилиб бўлдингиз. Энди терингизга дам беринг. Кимлардандир эшитган уй шароитида тайёрланадиган янгича “супер” натижа берадиган ниқобларни бажариб ўтирманг яна. Аллергия бериб қолса нима қиласиз? Жуда кўнглингиз бўлмаса, косметик лойдан тайёрланган ниқобларга мурожаат қила қолинг.

1 кун қолди: таомномага диққат қиламиз

Одатда, қизлар ҳаяжонни босиш кўп миқдорда егулик тановул қилишади ёки сув ичишади. Бироқ ювилмаган мева еб қўйсангиз, ёки тинчланиш учун кўп миқдорда шоколад истеъмол қилсангиз, тўй куни турли нохушликлар юзага келиши мумкин. Кўп миқдорда сув ичганда эса қовоқ атрофлари шишади. Бироқ умуман овқатланмай қўйиш ҳам нотўғри. Бунда терингиз сўлғин кўринишга келади. Шунинг учун, албатта, овқатланинг. Фақат меъёрида.

МАФТУНА тайёрлади.