Turkmaniston prezidenti Qurbonquli Berdimuxamedov 9 yanvar kuni
Turkmaniston yonilg'i-energetika majmuasiga 2015 yilda mamlakatda tabiiy
gaz olish hajmi va uning eksportini ko'paytirish vazifasini qo'ydi, deb
axborot beradi mahalliy OAVga asoslanib, "RIA Novosti” nashri.
Davlat rahbari 2014 yilning yakunlariga bag'ishlangan hukumatning
kengaytirilgan yig'ilishida Turkmaniston YoEM tabiiy gaz hajmini 83,8
mlrd kubometrga, uning eksportini esa 48 mlrd kubometrga oshirishi
kerakligini ta'kidlab o'tdi.
Shuningdek, Berdimuxamedov 2015 yilda neft qazib olishni 11 mln 110 ming
tonnagacha ko'paytirilishi kerakligini aytib o'tgan. Prezident YoEM
rahbarlari oldiga siqilgan gaz ishlab chiqarilishi hajmi va eksportini
ko'paytirish, Turkmaniston energiya tashuvchilarini yangi yo'nalishlar
bo'yicha etkazib berish, Turkmaniston-Afg'oniston-Pokiston-Hindiston
(TAPH) gaz quvurining qurilishi loyihasini amalga oshirilishi
sur'atlarini jadallashtirish vazifalarini qo'ydi.
Ma'lumot uchun, Turkmaniston tabiiy gaz zaxiralari bo'yicha Rossiya,
Eron va Qatar bilan bir qatorda dunyoning etakchi to'rt mamlakatidan
biri hisoblanadi. Bugungi kunda Turkmaniston gazi Rossiya, Xitoy va
Eronga eksport qilinmoqda. Turkmaniston 2015 yilda TAPH gaz quvuri
qurilishini boshlashni mo'ljallagan.