У нас есть только
оригинальные песни

Қулоққа айтиладиган гаплар ёхуд жинсий ҳаёт муаммолари

calendar 17.10.2016
5573

Бугунги саҳифамизни мухлисларимизнинг мурожаатлари асосида тайёрладик. Рости, уларнинг бизга бўлган ишончидан, ўзларига сирдош деб билганларидан хурсанд бўлдик. Бу ишончни оқлаш, сизга ҳақиқий сирдош бўлиш учун барча саволларингизга жавоб беришга ҳаракат қиламиз. Бугун саволларингизга сексопатолог-шифокор Демир АЛЕКСЕЕВ жавоб беради. Азиз мухлислар, кимлигингиз, қаердан қўнғироқ қилаётганингизни сир тутишимизни сўраганингиз учун исм ва манзилингизни ёзмасликка қарор қилдик…

 

«Заҳм қайталайдими?»

«Бир неча йил олдин эрим заҳм (сифилис)нинг енгил турига чалиниб,диспансерга қатнаганди. Лекин шифокор белгилаганидек тўлиқ даволаниш имкони бўлмади. Ҳозир ўзида ўшандагидек ҳолатлар такрорланаётганини сезаётганини айтди. Бу касаллик қайталайдими?»

— Заҳмда турғун иммунитет ҳосил бўлмайди. Шунинг учун ҳам даволаш охирига етказилмаган касаллик яна қайталаниши мумкин. Сифилисга чалинган бемор аслида венерология диспансерида ҳисобга олинади ва мунтазам текшириб турилади. Бемор даволанишни охиригача етказмаса, касаллик ривожланиб, жиддий тус олади. Бунда ички аъзолар, асаб ва суяк тизими зарарланади. Ҳатто кўриш нерви атрофияга учраб, бемор хира кўрадиган бўлиб қолади, хотира заифлашади, талаффуз бузилади, зеҳн пасаяди.

Бемор тўла-тўкис даволанмаган ҳолларда заҳм унинг авлодига ҳам ўтиши мумкин. Яъни фарзанди дунёга келмасиданоқ туғма заҳмга чалинади. Бу касаллик билан оғриган беморлар то соғайиб кетгунча жинсий яқинлашувдан сақланишлари зарур. Даволаниш чоғида эркак чекмаслиги ва спиртли ичимликлар ичмаслиги, витаминга бой овқатлар истеъмол қилиши муҳим.

 

Простатит дарди

«Простата бези яллиғланиши билан кечадиган простатит касаллигининг ўткир ва сурункали турлари бор экан. Уларни бир-биридан қандай фарқлаш мумкин?»

— Ўткир простатитда бемор тез-тез сияди, пешоб ажратганда жинсий аъзосида санчиқ туриб, ҳатто ҳожат вақтида тўғри ичакда ҳам оғриқ кузатилади. Бу касаллик ўз вақтида даволанмаса, простатитни вужудга келтирган инфекциялар атрофдаги аъзо ва тўқималарга ҳам ўтади. Оқибатда простата безида пайдо бўлган абсцесс (йиринглаш), ҳатто сепсисс (қонга йиринг тушиши)га олиб келади. Бу эса эркакни бепушт қилиб қўяди. Ўткир простатитга чалинган бемор албатта шифохонага ётиб даволаниши керак.

Сурункали простатитда пешоб чиқариш ёки ҳожатдан сўнг бироз оғриқ туради, жинсий аъзодан камроқ миқдорда суюқлик ажралади. Сурункали простатида шифокор буюрган дори-дармонлар ва физиотерапия муолажалари тузалишга кўмаклашади. Бундай беморга аччиқ, шўр овқатлар ейиш, спиртли ичимликлар ичиш асло мумкин эмас. Ич юришиб туришига алоҳида аҳамият бериш лозим.

 

Мижоз сустлигига барҳам бериш учун…

«Эркакларда мижоз сустлиги пайдо бўлишининг асосий сабаблари нимада?» 

— Мижоз сустлиги (жинсий қобилиятнинг сусайиши) асосан олий асаб фаолиятининг бузилишига, масалан, туғма ва турмушда орттирилган асабий руҳий кечинмалар (яъни невроз, турли касалликлар билан оғриганда рўй берадиган невротик ҳолат, тушкунликлар)га боғлиқ. Эркак кишининг узоқ вақт ғам чекиши ҳам унинг жинсий қобилиятига зиён етказади. Ҳаддан зиёд чарчаш, уйқуга тўймаслик, иш ёки оила билан боғлиқ оғир маънавий вазиятлар рўй берганда жинсий муаммолар юзага келади.

Баъзан ёшга алоқадор ўзгаришлар (масалан, 45-55 ёшларда) туфайли ҳам жинсий қобилият йўқолиши мумкин. Мижоз сустлигига барҳам бериш учун аввало стресслардан қочиш, оила ва ишхонада соғлом муҳитни қарор топтириш, ўз вақтида дам олиб, тўйиб ухлашга эришиш зарур. Булар ёрдам бермаса, албатта мутахассис шифокорга кўриниш лозим.

Яндекс.Метрика