“Қувноқлар ва зукколар” фестивали барча ёшларни чорлаб қолади

24.03.2016

1635

Ёшлардаги ватанпарварлик руҳини кучайтириш, уларнинг бўш вақтларини мазмунли ташкил этиш, иқтидорли ёшларни излаб топиш, уларга ўз истеъдодларини намойиш этиш учун имконият яратиш, ёшлар орасида учраётган салбий иллатлар (“оммавий маданият”га кўр-кўрона тақлид қилиш, эрта турмуш қуриш ҳолатлари, рўй бераётган ижтимоий - иқтисодий жараёнларга бефарқлик ва лоқайдлик, интернетдан мақсадсиз фойдаланиш ва ҳ.к)ни ёшлар тилида ва сатирик кўринишлар орқали танқид қилиш, талаба-ёшлар орасида “Қувноқлар ва зукколар” кўрик-танловини тарғиб қилиш ҳамда янги мавсум беллашувларига старт бериш мақсадида жорий йилнинг 6 апрель куни соат 15:00 ва 19:00 да “Истиқлол” санъат саройида “Қувноқлар ва зукколар” кўрик-танловининг янги мавсуми очилишига бағишланган “Сафимизга чорлаймиз!” деб номланган фестиваль бўлиб ўтади. Фестивалда республикамизнинг энг сара жамоалари, жумладан, 2015 йилги мавсум чемпиони “Турон” жамоаси иштирок этади. Қолаверса, эстрадамизнинг ёрқин юлдузлари ҳам ёшларга ҳақиқий байрамона кайфиятни улашишда ёрдам беришлари кўзда тутилган.
Маълумот ўрнида, “Қувноқлар ва зукколар” кўрик-танловининг саралаш беллашувлари (13 та беллашув) Тошкент шаҳри ва 7 та вилоятда, март-апрель ойларида, ярим финал беллашувлари (5 та беллашув) Тошкент шаҳри ва 3 та ҳудудда, май-июнь ойларида ўтказилади.
“Қувноқлар ва зукколар” кўрик-танловининг финал беллашуви Тошкент шаҳрида, ноябрь ойида “Ёшлар ҳафталиги” фестивали доирасида ташкил этилади.

“Қувноқлар ва зукколар” кўрик-танловининг бош координатори Умарбек Рамманкулов.