Владимир Кличко бўйи 206 сантиметр бўлган британияликка қарши рингга чиқади

Бокс бўйича тўртта йўналишда жаҳон чемпиони ҳисобланган Владимир Кличко британиялик Тайсон Фьюрига қарши рингга чиқади. Reuters’нинг хабар беришича, оғир вазнда рингга чиқувчи Фьюрининг энг асосий ўзига хослиги – бўйининг 206 сантиметрлигидир.

"Менга маълум қилишларича, мен совринга асосий даъвогарлар билан жанг қилишим шарт экан. Катта эҳтимол билан, менинг кейинги рақибим Тайсон Фьюри бўлади”, – деди Кличко.

Жанг жойи ва санаси ҳозирча маълум эмас. Бўйи 198 сантимтр бўлган Кличконинг сўзларига кўра, Фьюрига қарши жангда у WBA чемпионлик камарини ҳимоя қилади. 26 ёшли британиялик профессионал рингда 24та жанг ўтказиб, барчасида ғалаба қозонган (18тасида – нокаут билан).

25 апрель, шанба куни Кличко америклик Брайант Женнингсга қарши жангда ўзининг барча (WBA, WBO, IBO, IBF) чемпионлик камарларини ҳимоя қилди. 39 ёшли украиналик ҳакамларнинг якдил қарорига кўра ғалаба қозонди. 67 жанг ўтказган Кличко ҳисобида 64та ғалаба (53таси – нокаут билан) ва учта мағлубият бор. Manba: kun.uz