У нас есть только
оригинальные песни

Ўзбекистонда Ўрта Осиёдаги энг узун туннел қурилиши якунланди

calendar 31.05.2016
1975

Май ойининг охирги кунларида Қамчиқ довони орқали темир йўл туннели қурилишини якунланди.

“Ўзбекистон темир йўллари” сайти маълумотига кўра, узунлиги 19,2 километр бўлган ушбу туннел Ўрта Осиёда энг узун темир йўл туннели бўлди.

Темир йўлнинг "Қамчиқ" туннели ичидаги 11-километрида рельслар туташтирилди. 27 май куни "Ангрен-Поп" электрлаштирилган темир йўл участкасидан тажриба тартибида биринчи поезд ўтган.

“Туннелда темир йўл излари ва коммуникация воситалари ўрнатилган. Ўтган дам олиш куни поезднинг синов  қатнови ўтказилди”, — дейилган манба хабарида.

Поездларнинг туннел орқали доимий ҳаракати июнь ойининг охирида бошланиши режалаштирилган.

China Railway Tunnel Group компанияси 2013 йил ёзида “Ўзбекистон темир йўллари” билан шартнома тузганди. Шартноманинг умумий қиймати 455 миллион долларни ташкил қилган. Шартнома доирасида хитойликлар  узунлиги 19,2 км бўлган туннел ва фавқулодда ҳолатларда керак бўладиган алоҳида ер ости йўлаги қуриб битказди.

Ушбу туннел умумий узунлиги 124 километр бўлган “Ангрен – Поп” темир йўлининг бир бўлагига айланади. Натижада Фарғона водийси Ўзбекистоннинг бошқа вилоятлари билан қулай темир йўл алоқаси билан боғланади ва келажакда Қирғизистон ва Хитой темир йўл тизимларига уланиши режалаштирилган.

Лойиҳа халқаро ташкилотлар молияси асосида амалга оширилмоқда. Инвестицияларнинг умумий қиймати 1,68 млрд долларни ташкил қилди.

2015 йилнинг август ойида янги темир йўлнинг 104 километрлик участкасида қурилиш ишлари якунланганди. Барча зарурий ишлар амалга оширилган, кўприклар ва сунъий иншоотлар барпо этилган, рельслар ётқизилган, электрлаштириш олиб борилган, шунингдек, вокзал ва станциялар қурилган.

2016 йилнинг февраль ойида эса бурғулаш ишлари якунланди, сўнг туннелнинг асосий йўналиши туташтирилди.

“Қамчиқ” довони денгиз сатҳидан 2,2 минг метр баландликда жойлашган. Довон орқали Ўзбекистонни Фарғона водийси билан улайдиган ягона автомобиль йўли жойлашган. Қиш вақтида ёғингарчилик кучайганда довон орқали қатнов анча мушкуллашади. Янги темир йўл алоқаси ушбу муаммонинг муваффақиятли ечими бўлиши мўлжалланган.

Яндекс.Метрика