Yomg'ir ostida... Tushkunlikdan xalos bo'lamiz!

04.01.2017

1096

Ҳар биримизнинг ҳаётимизда нохушликлар бўлиб туради. Ахир буни ҳаёт деб қўйишибди. Хўш, сиз стресс тузоғига тез илинадиганлар тоифасиданмисиз? Уларга чап беришни, тушкун кайфият устидан ғолиб чиқишни қанчалик уддалайсиз? Марҳамат, махсус тестимиз орқали саволларга жавоб топинг.

Шартимиз

Бир зум хаёлан ўзингизга танаффус эълон қилинг. Яъни бўлмағур ўй-фикрларни ҳайдаб солиб, қўлингизга 2 та оқ варақ олинг. Рассомлар каби бетакрор сурат чизишингиз шартмас. Шунчаки қалам, ручка, фломастер ёки мўйқалам билан биринчи вараққа инсон суратини, иккинчисига эса ёмғир остидаги одам тасвирини чизинг. Улар бир-бирини такрорлаши ёки иккаласи ўртасида узвий боғлиқлик бўлиши шартмас. Қандай истасангиз, шундай чизинг. Яъни бу бир одамнинг турли ҳолатдаги икки хил тасвири бўлиши мумкин.

Эътибор берамиз!

Энди иккала тасвирга ҳам диққат билан қаранг. Уларнинг бир-биридан фарқларини сезаяпсизми? Биринчи сурат сизнинг ҳаётдаги қийинчиликларга муносабатингизни билдирса, иккинчиси эса муамоларни қандай ҳал қилишингиздан дарак беради. Ёмғир, бу — стресс белгиси.

Саволларга жавоб беринг!

1. Ранг ўзгариши қанақа? Суратларнинг фони, одамларнинг ранги қанақа? Ёмғир томчиларини қандай рангда тасвирлагансиз?
2. Иккала суратдаги одам ҳам бир жинс вакилими?
3. Уларнинг ёшларида тафовут борми?
4. Суратлардаги кишиларнинг ўлчами қандай?
5. Чизган суратларингизда қанақа деталлар бор?
6. Ҳимояланганмиз? Соябон, ёмғирпўш, бекат?

Жавобларингизни шарҳлаймиз!

1. Агар сиз ёмғир томчиларини ҳам, одамларни ҳам, умуман сурат чизишда ёрқин ранглардан фойдаланган бўлсангиз, демак, инсон борки, унинг бошига иш тушади, дейдиган тоифадансиз. Стресслар ранг-барангликдан қўрқади, ҳаётни ёрқинлаштириш ўз қўлимизда, деб ҳисоблайсиз. Сурат чизишда қора қалам ёки ручкадан фойдаланган бўлсангиз, бирор муаммога дуч келсангиз, ҳатто у кичик бир ҳодиса бўлса ҳам, дунё кўзингизга қоронғу кўриниб кетади. Ўзгаринг.
2. Агарки сиз иккала суратда ҳам ёки иккинчи расмда эркак кишини тасвирланган бўлсангиз, фаол, шарт-шурт қарор қабул қилувчи, масалага тез ечим топувчилар тоифасидансиз. Мабодо аёл кишини чизган бўлсангиз, демак, депрессия, кўз ёш, муаммони ечишмас, уни чайнаш сизга хос. Биринчи суратда аёл, иккинчисида эркак, ёки аксинча бўлса, ўзгараяпсиз. Қайси томонгалиги эса суратдаги одамнинг жинсига боғлиқ.
3. Биринчи тасвирдаги ёш бола ёки ўсмир иккинчисида улғайса, сизнингча катталар ҳамма масалани еча олишади. Улғайсам ёки бирор нимага эришсам (масалан, лавозимим кўтарилса, оила қурсам), доим кайфиятим чоғ бўлади, деб ўйлайсиз. Яна ёмғир остидаги одамнинг ёши катталиги муаммоларга жуда жиддий қарашингиздан, кексалик эса муаммоларни ақл билан ечишингиздан далолат. Суратлардаги ёш бола йиғлаётган ёки ўтириб олган бўлса, демак, муаммолар қаршисида ҳам эркалик қиласиз. Мабодо у ўйнаётган, рақс тушаётган, кулаётган бўлса, болаларча беғуборсиз ва сиз учун ҳар нарса ҳам муаммо туғдирмайди, туғдирган тақдирда ҳам уларни тез енгасиз.
4. Иккала суратдаги одамлар тасвирининг ўлчами қанақа? Кичик бўлса — кўнгли нозиклик, таъсирчанлик, ожизликни билдирса, жуда катта тасвирлаш асабийлик, жаҳлдорликни ошкор этади. Ўз ёшингиз ва бўйингизга мослиги, бу — муамоларни «Шунақаси ҳам бўлиб туради-да энди», дея қабул қилиш ва ўз имкониятларингиз доирасидан ечишга уринишингизни билдиради.
5. Қора булутлар — стресс ҳолатининг сабабларини излашингизни, кўлмак эса жуда таъсирчанлик, узоқ вақт тушкунлик тузоғидан халос бўлолмаслигингизни англатади. Агар қуёш, камалак, ўсимликларни акс эттирган бўлсангиз, ҳаёт фақат муаммолардан иборат эмас, ҳар қандай ҳолатда ҳам инсон хурсанд бўлиши учун сабаб топилади, фақат уларни кўра билиш керак, дея фикрлайсиз. Мабодо девор ҳам чизсангиз, бошга иш тушганда, албатта, кимгадир суяниш лозим, ёлғизлик инсонни депрессия ботқоғига янада ғарқ этади, дея атрофдан нажот излайсиз.
6. Энди қандай ҳимояланганингизга тўхталамиз:

• Сизнинг ёмғир остидаги одамингиз ҳеч қандай ҳимоя воситасига эга бўлмаса ва юзида табассум акс этмаса, ёмғир остида турса, расм деталлардан холи бўлса, шу кунларда ўзингизни ёлғиз, чорасиз, ҳимоясиз, дунёнинг бор ташвиши сизнинг бошингизда айланаётгандек ҳис қилаяпсиз. Ростан шунақами? Ёки иммунитетингиз стрессларга шунчалик пастми? Хуллас, яхшилаб ўйлаб кўриб, ўзингизни чалғитинг.
• Қўлингизда соябон бор-у, аммо у сизни ёмғирдан ҳимоя қилмаётган бўлса, яъни ёмғир остида завқлансангиз, демак, бу дунёда чорасиз нарсанинг ўзи йўқ, деб, муаммоларни кулиб қаршилайсиз.
• Ёмғир томчилари соябон устига тушаётганини тасвирласангиз, муаммо пайдо бўлдими, уни ҳал қилиш керак, деб чора кўрасиз.
• Ёмғирпўшга ўраниб олсангиз, хавфни олдиндан сезиб, уни ўзингизга йўлатмаслик ҳаракатида бўласиз.
• Бекат остида ёмғир тўхташини кутиш эса муаммолардан қочишингиздан далолат.

Шоира ВАФОЕВА тайёрлади.